NAMA KEBUAH KITAI TAKUT?

Kitai takut laban enggaika rumah panjai kitai badu agi diberi orang projek-projek MRP? Takut enggaika bantu E-Kasih dibatak pulai? Kitai takut enggaika bala anak kita kena ‘marked’ orang lalu ngujungka sida enda ulih nerima bantu scholarship ila? Kitai takut enggaika kitai diri sebilik tauka kaban belayan kitai dipindahka orang bekereja ngagai endur bukai ti jauh-jauh? Kitai takut enggaika kitai diukum enggau chara enda diberi pemansang?

MAYUH ARI BALA KITAI TAKUT SERETA NANGI KE RUMAH KITAI DITIKI RABAN PKR. KITAI NANGIKA DIRI EMPU ENGGAU RUANG BILIK KITAI DIPECHAT BALA MATA GELAP BN. MAYUH ARI BALA KITAI TAKUT NGUNDI PKR. KITAI PECHAYA KE KERTAS UNDI KITAI NYA ULIH DITEMU ORANG. Tang utai tu bula magang - ngemba pengundi nya udah nyadika chara BN ngulihka undi kitai. Undi kitai nya RESIA (dipelalaika) - laban atur nya nitihka undang-undang. Penyampau keretas undi nya diitung, dikunchi dalam peti undi, dilakri ba mua raban pengari ari parti-parti ti bediri minta pilih, disimpan dalam pengelama 100 hari dalam District Office lalu enti sema nadai penyelai tauka penyarut ba kertas undi nya sepengudah 100 hari, kertas undi nya deka dikeluarka ari peti undi lalu ditunu, disaksika pengari-pengari ti udah bediri minta pilih. Enti sema sekeda ari lakri nya bisi dibali tauka dibuai sebedau timpuh 100 hari nya abis, pengari-pengari ti bediri minta pilih tau ngangauka undi diatur baru! Nya kebuah undi kita nya RESIA lalu nadai orang ulih ngelala sapa ti udah diundi kita. Lumur siri ba atas kertas undi nya enda senutuk enggau nama kita - lumur-lumur siri nya semina dikena raban polling agent betipakka penyampau undi enggau penyampau keretas undi. Anang mudah dikemulaka orang ti madahka lumur siri ba keretas undi nya senutuk enggau nama kita.

Pengasai ati mensia mayuh di serata menua kitai tu udah berubah. Mensia mayuh di nengeri besai enggau di Semenanjung Malaysia enggau Sabah deka ke ubah ke perintah ti baru. Kami pechaya bendar KITA mega begunaka ubah laban deka ke perintah ti manah agi, lurus agi, enggau mentas agi. Semua kelai tu nunjukka Pakatan Rakyat ulih menang ba bepilihbesai ke-13 tu ila. Nya kebuah Najib Razak takut sereta nangi bendar deka mutuska runding enggau penemu diri empu ba milih haribulan ti betul endur ngatur bepilibesai lalu iya berupai bendar betangguh-tangguh! LEBUH PAKATAN RAKYAT UDAH MENANG ILA, BN DEKA LENYAU KUASA SIDA DIKENA NGEMEDIS KITA SEBILIK, KITA SERUMAH TAUKA KITA SEMENUA!

BN meri kita mayuh macham projek MRP. Lebuh Pakatan Rakyat menang, kami mega ulih meri kita projek-projek MRP enggau LEBIH AGI ari nya! Kami deka mulaika tanah-tanah ti udah diambi ari kita, melakin semua jalai alun awakka nyamai ditengah, masang paip ai kena mekal kita enggau ai beresi lalu mega enggau kuasa elektrik ti murah! Ke diatu BN meri kita bantu E-Kasih RM300. Lebuh Pakatan Rakyat menang, kami deka nambahka bantu E-Kasih nya ngagai RM550! BN mantu anak kita nyambung pelajar ngena scholarship ti ke bendar iya dijali ngagai sida tang udah nya sida dipinta mayar duit scholarship nya ngagai perintah ninting bulan? Lebuh Pakatan Rakyat menang kami deka ngapuska scholarship jali nya! Lalu bala anak kita tau minta bantu SCHOLARSHIP PECHUMA NYENTUK KE SIDA TEMBU BELAJAR BA IKAS UNIVERSITI! Lebuh Pakatan Rakyat menang, bisi BN kuasa mindah-mindahka sapa-sapa orang ti kereja perintah ti udah nyukung PKR, DAP tauka PAS? 

Bala INDAI ENGGAU BINI ORANG, bisi BN mantu kita ngena duit simpan EPF? Ba perintah Pakatan Rakyat ti chukup mentas, SEMUA indai enggau bini orang deka nerima bantu EPF RM50 sebulan ti dipejalaika dalam atur SKIM CARUMAN WANITA NASIONAL!

RABAN ORANG TI TUAI UMUR deka nerima bantu RM1,000 SETAUN, lalu ruang bilik ti seranta deka nerima RM1,000 KE SIKU ANAK ARI BARUH UMUR 12 TAUN NINTING TAUN! Ulih BN mantu kita baka nya? Nemuai mih kita ke menua Selangor enggau Pulau Pinang ti endur perintah Pakatan Rakyat benung bekuasa diatu, lalu peratika baka ni rakyat sida diidupka. Semua tu utai ti bendar sereta amat magang, enda baka pemula BN ti seruran besemaya tiap kali musim bepilihbesai tang jarang bendar dikamatka.

KE BENDAR, BN NYA MIH RABAN ORANG TI TAKUT SERETA NANGI! BN nemu bala orang di Semenanjung enda agi takut, bala orang di Sabah mega enda agi takut lalu PIA MEGA BALA ORANG DI SITAK SARATOK ENDA AGI TAKUT! Nya alai, nama kebuah kitai di Betong agi takut sereta nangi? BN nyau majak TAKUT laban sida nemu diri deka alah ba bepilihbesai ti deka diatur tu ila. Nya mih kebuah BN ngatur semua macham pengawa dikena ngambi ati kita awakka ngundi BN enggau chara besemaya manis-manis lalu ngemba kita enggau penerang bula pasal Pakatan Rakyat. Numbas mih! BADU AGI BEGADAI SERETA BEJUDIKA REBAK DUDI RABAN ANAK UCHU KITA. BERUNDING MIH PANJAI-PANJAI, PERENING MIH JAUH-JAUH, KE PEMANAH ENGGAU PENGUNTUNG BALA ANAK UCHU KITA. TU MIH MAYA KITA NGENA PELUANG NGUBAH SERETA MANTU SIDA TI REBAK DUDI.

Lebuh Pakatan Rakyat menang lalu ulih megai perintah di Putrajaya, enti orang Betong mengkang nyukung BN ketegal takut ke BN, lalu BN menang di Betong, ari nya bala pengari BN deka bekalih raung nyadi Penyakal, lalu iya enda ulih agi mai ke kita pemansang baka ti ulih diberi pengari Pakatan Rakyat ke kita! Iya deka nadai agi kuasa lalu iya mega enda diagihka perintah projek-projek MRP ti deka diberi iya ke kita lalu Betong deka tinggal jauh di belakang laban menua Betong nadai pengari Pakatan dalam kabint perintah. NYA ALAI, BALA ORANG DI BETONG, DEKA KITA SAUM ATI ENGGAU BALA ORANG BUKAI DI MALAYSIA LALU NGUBAH TAUKA DEKA KITA DITINGGALKA DI BELAKANG LALU BESAUM ENGGAU RABAN PENYAKAL?

Raban Dayak enggau Melayu di Betong endang chukup tebilang sereta tampak rita ketegal pemerani sida beperang lalu ngetanka Betong ari kena keruga Rajah James Brooke dulu menya. Kitai mengkang ingat sereta ulih ngenang pasal cherita sida aki ini kitai nya. TANG NAMA KEBUAH KITAI EMPU TI TAKUT DIATU? Pemerani sida aki ini kita endang mengkang dalam darah tubuh kitai tu. Angkat! Badu takut agi! Kitai enda ibuh belaban ngena duku, perambut enggau sangkuh baka sida aki ini kitai kelia; diatu kitai semina begunaka sebatang pinsil lebuh kitai ngundi! AYANKA NGAGAI DUNYA NYA RABAN DAYAK BETONG NYA ORANG TI BERANI SERETA KEMPANG ATI SEKALI AGI, LALU BADU AGI DIKEMELI SERETA DIKELESEKA BN!

“Laban Allah Taala ukai meri kitai roh penakut, tang roh kuasa, roh pengerindu enggau roh disiplin diri empu.” 2 Timoti 1:7

 

[TAU DIDOWNLOAD GAMBAR GAMBAR TU LALU DIAGIH]