ENTI NUAN NYA SIKU PENYUKUNG PAKATAN RAKYAT, NUAN PATUT MACHA TU.

Utai ti deka dipadahka aku ditu nya UTAI TI BENDAR.

Berita selebubu ngapa benung dikenang sebelah-belah media sosial ti madahka Pakatan Rakyat nya disadang menang, ambi ke banding:

“(Just got this msg from a friend. Unconfirmed report) Apparently Putra Jaya issued an order that weffm Monday, all staff not allowed OT and only authorized staff are allowed into PM department !!!! They saw the revolt at PAS Ceramah in Putrajaya recently. Clearly Prime Minister Office are cleaning shits in the office before handover. Sign of bn preparing defeat.”

Tu disadang nyadika sebengkah propaganda timbal ti benung disadung BN dikena sida ngasuh meri pengandal ati ti kelalu lebih ke bala penyukung Pakatan Rakyat awakka kitai lalek sereta enda ngadang ke sebarang pekara ti enda disadang nyadi. Lebuh kitai udah berasai selamat, kitai lalu enda besedia tauka enda ngadang. Lalu nya mih maya BN deka masuk lalu ngalahka kitai.

Lalu agi mayuh mega jaku selebubu ngapa bukai ti benung disadung:

 “Beribu-ribu iku pengundi antu udah dianjung ke menua Selangor ari menua Sabah.”

 “Bala pengundi ti udah berejista ti udah ditemu kala ngundi Pakatan Rakyat ba bepilihbesai ke-12 nyin kemari udah dibuai nama sida ari rintai nama pengundi udah bekau sida nganjung kad pengelala (IC) sida ba pengerami ti dibelanja BN.”

Nadai siti berita ti di atas nya udah ditemu amat tauka bula lalu kitai enda patut muai jam kitai beperagamka ke berita-berita nya. Kitai semina bisi lalu beberapa hari da agi sebedau datai ba 5^hb May tu.

Enti nuan deka nemu pekara ti amat, bacha semua tu:

1. Raban orang ti indu mayuh ditemu pulai ngagai BN, terima kasih ke pemeri ngena mata duit enggau projek-projek kilat.
2. Pengundi ari raban Melayu-Muslim mayuh udah ditemu mulaika diri ngagai BN laban sida takut kena keduan raban ti ukai Muslim.
3. Raban pengundi ukai Muslim di sebelah nengeri benung diemba ngena penemu HUDUD lalu mutuska penemu diri ngundi “raban antu ti dikelala ari ti nyukung antu ti enda dikelala sida”, taja pan HUDUD nya nadai dilansa tauka dikenang dalam Manifesto Pakatan Rakyat.
4. Ba tiga hari ti penudi nya BESAI BENDAR RETI laban lebuh nya BN deka chakah sereta regas agi bejalaika kimpin sida. Kitai deka meda duit ngalun baka pangka umbak tsunami, jaku emba, berita selebubu ngapa enggau berita-berita pasal penyalah bala tuai parti Pakatan Rakyat deka disadung (dikena BN ngerusak pengarap ati pengundi ngagai Pakatan Rakyat).
5. Jaku-jaku tuduh pasal penyalah bala tuai PR deka ditempa, lalu berita selebubu ngapa pasal dawat meruan, pengundi antu enggau pengelenyau nama pengundi ari rintai nama pengundi deka nyadi amat.

Nama reti semua utai tu? Reti nya Pakatan Rakyat engka udah bulih sukung ti manah ba beberapa taun tu udah tang BN majak lenyau sukung lalu Pakatan Rakyat engka deka lenyau lalu alah ba majority ti mit bendar. Ingatka Bepilihbesai Sarawak 2011 kemari lebuh kitai andal bendar ngumbai diri ulih menang?

Nama utai patut dikereja NUAN dikena mantu nagang BN menang sekali tu? Enti nuan semina duduk nunga komputer nuan lalu rauh-rauh dalam media sosial enda mai asil ti deka nyadi nyata.

Angkat diatu, lalu bejalai nuju opis kimpin Pakatan Rakyat (PKR, DAP tauka PAS) ti semak endur kita diau lalu meri diri enggau orang bekereja, tauka semina nyadi pemerati tauka polling agent.

1. Kitai patut nyaga bala pengundi kitai awakka enda mudah kena umbuk raban BN dikena sida ngetanka penuduk sida merintah baka selama. Pengawa kimpin tu mudah dikereja - sebut ngagai orang bukai lalu terangka ngagai sida nama kebuah nuan deka nyukung Pakatan Rakyat. Terangka ngagai sida nama kebuah pemeri ngena mata duit nya semina utai ti enda meruan lalu enda ngubah rebak kitai ti dudi hari.
2. Kitai patut nyaga undi kitai lalu nuan ulih ngambi bagi enggau chara meri diri nyadika pengintu undi-undi ari ti nyadi pemerati tauka polling agent. Tu mih atur  kitai ngetanka diri - aram, lalu bediri enggau kami lalu tegapka kuda-kuda kita sereta jaga mih undi NUAN ari kena churi.

Aku tu meri kita berita ti bendar. Ukai jaku ti selebubu ngapa. Diatu teserah ngagai nuan empu ngambi bagi enti nuan deka ke Pakatan Rakyat menang kena 5^hb May tu ila.

Lalu pekara ti pemadu beguna, NUAN enggau SEMUA penyukung Pakatan Rakyat patut nurun ngundi bebala mayuh, beabis-abis, betambit pintu, bekaling alu dikena ngalahka pemayuh tubuh pengundi antu (BN)! Tiap iti undi nya besai bendar reti! Tiap iti kerusi nya mega besai bendar reti!

Pekunsika mih pesan ti beguna bendar tu.

VERNON AJI KEDIT

Information Chief

PKR Sarawak