Najib: Nama kebuah nurunka rega minyak enti bantu BR1M nya manah agi ku nuan?

Bisi kita macha lalu ninga penerang pasal pekara ekonomi ti pemadu tambap sereta beli ti dipansutka Menteri Besai sementara kitai nya?

Bacha berita nya ditu: http://www.malaysiakini.com/news/228093

Kepala BN Najib Razak madahka atur nurunka rega minyak nya nadai nguntungka raban orang ti suntuk baka bantu BR1M ti disadung iya nya.

“Enti kitai nurunka rega minyak petrol, sapa ti untung? Bala orang ti kaya-kaya deka untung. Bala orang ti kaya ti bisi kerita besai-besai nya meh ti deka untung.

“Tang lebuh kitai meri bantu BR1M, sapa ti untung? Bala rakyat deka untung,” ku iya bejaku ti lalu disambut enggau tempap jari mensia mayuh.

Enti Najib endang amat-amat ngeringka jaku iya nya, nya nunjukka iya NADAI PENEMU pasal pekara ekonomi enggau belanja. Tu mega lalu nerangka nama kebuah utang menua tu niki ngagai iksas RM502 billion sekumbang diperintah Najib!

Sebarang orang ti pandai sereta landik ba pekara ekonomi tentu deka madahka kita lebuh kita nurunka rega minyak, iya deka ngerampit penurun rega barang bukai. Nama kebuah? Nyau deka semua barang ti dikeluarka nya begunaka kuasa ari minyak petrol. Semadi meh Najib ulih mekal semua palan pengeluar barang nya ngena kuasa solar (ari mata panas) tauka kuasa puput angin!!! Atur pengangkut nganjung barang ngagai kandang menua di ulu sungai mega deka turun, ti ngujungka ai Coca Cola dalam tin ulih dibeli bala orang di Sungai Asap di Belaga, ti diatu mayar rega ai irup nya RM5 setin. Au, nya meh pengamat utai ti enda diperati tauka dikingatka Najib.

Tang Najib nya ukai bangat beli. Nya kebuah kita patut ngaga siti simpul penemu ba iya: Najib nya nusui pemula ngagai kitai!

Sanggup kita ngundi perintah ti betuaika orang ti pemula? Banggar? Penipu?