JAKU TESAU NUJU SEMUA BALA PENGAYAU KAYAU BESAI

Tabi basa ke bala pangan enggau bala pengayau Pakatan Rakyat di Sarawak,

Lebuh aku dani pagi tu lalu macha suratberita, aku ngumbai Barisan Nasional udah menang ba pengawa bepilihbesai, laban beratika bala tuai Barisan Nasional nebah lagu puji ti diundan dalam Manifesto Barisan Nasional ti baru udah dilancharka ba ujung minggu tu tadi.

Terang bendar mih Barisan Nasional ngena semua suratberita ti dikemataka tauka dikuasa sida meri gambar ngagai bala pemacha sida nya udah menang. Tu mih dikumbai kita PROPAGANDA lalu pechaya mih ke aku, utai ti baka deka majak nyadi balat agi ninting hari. Pagila suratberita deka ngundan mayuh agi serang ari Barisan Nasional nyentuk ke ngagai maya muai undi ila. Perang ngena jaku udah belabuh lalu kompeni suratberita nadai pilih bukai tang semina nyelak semua macham propaganda BN.

Anang kita alah dikemelika propaganda BN. Anang takut. Tegapka ati enggau runding kita. Lalu ke lebih beguna, anang putus pengarap. Kayau tu baru belabuh. Raban BN udah belabuh nebah tabuh kayau sida. Anang kita teguran ninga tabuh sida nya, laban tabuh sida BN nya semina dikena sida ngasuh runding kitai charut, ngasuh kitai teguran lalu ngenung baka empelekung mabuk ambuh, baka ikan mabuk keruh. [Tabuh enggau panjung bala BN nya semina baka “panjung orang ba pala wong”] Tegapka kuda-kuda kita! Besedia mih napi sida ti mansang ngagai kita. Awakka sida mansang ngagai kita, baka ti nganjung paung ke diempa jani. 

Aku minta kita nuruka semua pengering kita lalu numpuka perening kita dikena kita nimbal pemula enggau propaganda BN. Tu mih pengawa kita ba minggu-minngu ti deka datai tu nyentuk ngagai maya ngundi ila. Nadai utai bukai patut ulih ngelimpangka kita tauka ngasuh kita tekenyit sereta teguran ngapa.

Sekeda ari bala kita mudah tekuing runding ba politik lalu berengkah nyangka sapa orang ti nyadi pengari-pengari enggau ni bagi kerusi patut diempu parti ni. Umbas nya! Besangka-sangka baka nya semina masau hari ti berega kita nya. Semua sangka enggau pelaba kita nya deka disaut dalam beberapa hari ti deka datai tu ila. Tejuka raban sida ti tuai dalam parti mutuska penemu sida laban nya udah nyadika tanggungpengawa sida nguluka kitai tu. Tanggungpengawa kitai tu nurun ngayau belabuh ari ikas pengabis pugu lalu mengkang numpuka perening kitai ngagai tagit kitai. Tagit enggau juluk ati kitai diatu iya nya ngingkaska BN

Belabuh ari diatu, lebuh kita online, anang terunda-runda, anang kelalu randa, laban enggai ke kita tepejuh enggau orang berandau ke utai ti enda beguna tauka tama bilik chat tauka bilik forum ti endur orang berandauka sapa patut nyadi pengari enggau agih kerusi lalu sapa ti deka menang tauka sapa ti deka alah. Randau ti baka tu enda beguna lalu enda ngujungka kitai menang sebarang kerusi, enda pia? Tentu enda!

Nama utai ti tau ngasuh kitai menang? PEJALAI KIMPIN ONLINE TI BESTRATEGI ENGGAU EFEKTIF! Sapa raban orang ti deka diulihka kitai? Bala pengundi atas-pagar [enggau bala pengundi ti baru berejista nyadi pengundi]! Nama pengawa patut dikereja kita dikena ngambi ati bala pengundi atas-pagar awakka sida nya deka ngundi Pakatan Rakyat? Tauka kita semina masau hari bemain sangka-sangka ke pengari enggau kerusi?

Diatu bala cyber-trooper BN udah besedia ba semua media sosial ti endur sida nyerang sereta ngelemi semengat enggau pengarap bala penyukung Pakatan Rakyat lalu majak ngasurka isi Manifesto sida. Ulih kita napi sereta nimbal serang sida nya enggau efektif? Kitai patut betan maya ti patut endur ngetanka diri tang kitai mega enda tau enda nyerang awakka BN ngetanka diri. Ba taun-taun ke udah kitai udah nyerang enggau naka pemanah, nya alai anang ngetu nyerang. Atur manah ke singkang kita laban serang ke sekali tu bepanggai bendar ba penan seput kitai nyentuk ke ngagai maya ngundi ila.

Bala menyadi, tu mih peluang kitai ti pemadu manah dikena kita ngerampas Putrajaya. Minggu-minggu ti deka datai tu ila beguna amat ba kitai. Aku ngansak kita, kena mih tiap peluang kita dalam media-media sosial kita napi enggau nimbal serang propaganda ari BN. Ingat, jauhka diri ari berandauka agih kerusi, agih pengari, enggau besangka-sangkaka sapa ulih menang tauka sapa deka alah. Kayau tu udah belabuh lalu kitai enda tau enda napi munsuh kitai enggau naka ulih tulang-urat kitai, lalu ukai semina duduk nukung, genung-genung aja.

Aji

BAKA NI CHARA NGAMBI BAGI DIRI BA KAYAU BESAI? 

Dikena ngambi bagi ba kimpin online KAYAU BESAI, klik ba pemaut laman facebook Pengelurus Sarawak (https://www.facebook.com/pengelurus.sarawak) lalu udah nya INBOX ngagai kami alamat email nuan. Kami deka enggau naka ulih sereta jampat ngemasukka kita dalam rintai raban orang ti deka enggau kimpin lalu madahka kita nengah email. Lalu udah nya kita tau nyelak semua penerang ti bisi dimuatka dalam email kami nya lalu kita dipinta nyadung kereban nya ngagai orang bukai tauka ngemanjaika (forward) email nya ngagai bala kaban enggau pangan kita ti bukai awakka sida mega tau ngereja pengawa ti sama.

Anang takut. Kimpin online KAYAU BESAI tu sebengkah strategi kayau ti enda salah ba undang-undang. Strategi tu dikemendarka ba undang-undang pengawa bepilihbesai.

Tu meh KAYAU BESAI bansa Dayak ti enggai dikumbai tauka nyadi KAMPAR ba menua diri empu.

Petara nyelamatka Sarawak!