Udah temu lubuk baong SWP? Udah temu bangkai gajah?

Dato’ Seri Anwar Ibrahim udah mansutka semua nama pengari enggau kerusi ti diperebutka sida lalu semua pengari PKR nya deka belaban di Sarawak maya bepilihbesai tu ila, baka ti dirintaika ditu:

Limbang – Baru Bian

Batang Lupar – Abang Zulkifli Abang Engkeh

Lubok Antu – Nicholas Bawin 

Saratok – Ali Biju

Baram – Roland Engan

Selangau – Joshua Jabeng

Kanowit – Thomas Laja

Hulu Rajang – Abun Sui Anyit

Petrajaya – Ahmad Nazib

Santubong – Zulrusdi Hol

Betong – Cecilia Siti Una

Semua kerusi di atas nya endang ditagakan ngagai PKR, lalu nadai diperebutka enggau parti bukai dalam raban penyakal. Jaku gerah pasal semua kerusi nya mai mayuh macham empas, lalu empas ti berupai agi nya madahka parti SWP tauka Sng Chee Hua nadai kala bekaul enggau pengawa ngagihka kerusinya baka ti diperagamka sekeda orang.

Jaku gerah tu engka bisi ngenyitka ati sekeda orang, tang bala orang ti endang ngelala Sng Chee Hua sida nemu Sng udah lenyau pechaya Dato’ Seri Anwar Ibrahim kenyau ari dulu suba. Ingatka Batang Ai?

Diatu PKR ulih ngamatka jaku madahka sida nadai bekaul enggau SWP tauka Sng Chee Hua, sekali sechara terus tauka enda, lalu enggau nya udah datai ba maya iya bala raban teoris konspirasi patut ngetu ngaga pelaba tauka peragam pasal SWP.

Kami bisi ninga SWP benung chakah ngiga sukung ari bala kaban sida lalu sida mega minta bantu bala kaban sida nya. Amat enda kini berita tu? Kami mega ninga belanja SWP diatu majak kusut. Kami mega dipadahka SWP diatu nguji ngena mayuh macham propaganda dikena narit ati bala penyukung sida, lalu diatu mega sida enda ulih bula madahka sida bulih sukung ari Dato’ Seri Anwar Ibrahim. Pemula nya udah padam lalu SWP, baka ti dipadahka ngagai aku, udah baka ikan ti dipansutka ari ai.

Ba penemu aku SWP nya udah enda relevan agi, penuduk iya enda tegap sereta gilik-gilik, lalu pejalai politik iya udah datai ba pengujung ari. Sukung mih SWP ngena risiko kita empu. Anang ngumbai aku bedau kala nangkan kita dulu.

Ditu aku mantaika sekeda gambar ti diambi aku ari internet. Kita semina ngiga ngena Google lalu mudah bendar kita deka bulih gambar-gambar baka tu. Kunsika enggau kita sebilik tauka enggau bala bakih kita lalu mega kerembaika entri blog tu sebelah dunya cyber tu.

Gambar enda ulih bula, lalu sekeping gambar ngundan seribu leka jaku, munyi ku orang ti pandai-pandai.