Siku Orang Tuai Ti Udah Belabuh Ngeransi

Taib dipeda nyau belabuh ringat ba mua mensia mayuh, jarang bendar kitai ulih beratika tu. Jarang bendar

Nama reti kelai ti baka tu? Orang ti landik macha gerak tubuh mensia mudah bendar meretika pemanggul tu; ari orang ti liat ati Taib diatu suah dipeda jampat mgeransi. Taib mega tekelanjur jaku ngasuh bala pengarang berita mangku pengawa iya! Tang penanggul tu enda begunaka orang ti landik ba pelajar pasal macha gerak tubuh mensia endur ngelala nama kebuah orang kering PBB nya diatu benung dituntung tekan ti balat baik ari luar tauka ari dalam.

Penanggul ti nuntung ari luar, BN Sarawak diatu mupuk-mupuk pupur-sepupur baka punggu. Bala kaban SPDP benung angkat ngelaban presiden sida empu. PRS benung ngenatka pemedis lalu diatu James Masing berupai ngerara YB iya empu lalu meri sukung ke pengari dalam sitak kelimpah ari ti nyukung apai iya empu. Penyarut dalam PBB empu udah didinga dikenang bala orang di sebelah berandah tumpuk-tumpuk pendiau di sekayu menua Sarawak. SUPP mega bisi penyarut dalam parti sida empu. Laman-laman Sarawak Report, Radio Free Sarawak, Radio Free Malaysia, facebook enggau laman web ti bukai udah balat bendar ngenang isi video Global Witness ti udah mantaika but Taib enggau perintah iya.

Ulih tauka enda kini Taib nyerahka pemenang BN Sarawak ngagai Najib ke sekali tu?

Aruh iya ga Taib mudah bendar nyida sereta ngeransi. Lalu sapa mih orang ti diransi iya? Iya balat bendar mechat Lim Guan Eng, Kepala Menteri sementara Pulau Pinang ti udah mansutka jaku di Sibu madahka Taib deka ditukar sereta Pakatan Rakyat masuk ngagai Putrajaya. Dikena iya ngerichauka peragam bala peninga iya, iya udah ngenang pasal ukum HUDUD.

Tipu chara lama, Taib.

Ke bala orang ti baru ngelala, ukum HUDUD nya semina dikena ba pengarap raban MUSLIM aja. Orang ti ukai Muslim enda disangkung, laban di menua Malaysia, kitai bisi Kot Sivil enggau Kot Islam. Enti ukum HUDUD diterima, dikena lalu dipejalaika, lalu ambi ke banding siku Datin ti ukai Muslim diterumpak orang marik intan iya, iya tau milih lalu minta perumpak nya dipechara dalam Kot Sivil ti endur perumpak nya deka diukum jil tauka iya tau minta bantu Kot Islam becharaka penyalah perumpak nya - ti endur perumpak nya deka ditetak jari enti ditemu salah. Enti kita Datin ti ukai Muslim nya, ni bagi Kot dipilih kita?

Lalu semina orang ti jai aja deka takut ke HUDUD. Enti kita orang ti bebasaka undang-undang menua tu, nama utai dikenangika kita?

Kedua, dikena bejalaika HUDUD, Konstitusyen Perintah Besai patut diubah. Lalu sebarang lawyer tentu deka nerangka ngagai nuan, Konstitusyen Perintah Besai semina ulih diubah ngena majority dua-petiga. Taja pan enti Pakatan Rakyat ulih ngulihka kuasa majority dua-petiga dalam Parlimen, ba runding nuan, ulih tauka enda sebuah parti aja dalam pakat nya deka bejalaika langgur iya lalu melakangka parti bukai dalam Pakatan Rakyat?

Taja pan enti UMNO agi ngeringka jaku sida ke dulu suba lalu enda mukai-mukai nyukung HUDUD enggau chara begempung enggau siti ari pakat parti Pakatan dikena ngeringka HUDUD dalam Parlimen (ti tentu iya enda ulih laban langgur nya tentu deka munuh UMNO empu), bisi sida majority dua-petiga? Berapa iti kerusi dalam satu-petiga nya? 148 iti. Uji kira ngena matematik.

Nya alai anang mudah dikelimpangka ngena HUDUD. Aram kitai pulai ngagai utai ti bendar; Pengeringat Taib enggau tipu iya ti udah bari nya endang dikena iya ngerichau ke runding mensia mayuh.

Tu munyi report ti dikeluarka dalam Borneo Post sehari tu, http://www.theborneopost.com/2013/04/25/we-decide-whether-to-have-hudud-law-in-sarawak-taib/:

Kenu ku iya, iya enda ulih dibuai ari pengawa iya (kepala menteri) laban BN menua Sarawak menang dua-petiga majority dalam bepilihbesai taun 2011.

“Muai aku ngena chara kasar? Sapa ti deka muai iya (Lim)? Nya semina jaku ari mulut siku pemerintah diktaktor. Iya (Lim) enda nemu konstitusyen,” ku Taib ringat.

Aku minta diri enda sepenemu, lalu nya kebuah aku minta diberi nuan peluang ngemetulka penyaru penemu nuan, Tau. Nuan ulih dibuai ari penuduk nuan. Sebaka bendar enggau chara Stephen Kalong Ningkan dibuai suba.

Lumur 1. Nadai siku orang besakalka penemu BN Sarawak endang menang dua-petiga majority ba bepilihbesai 2011 suba, lalu ke bendar iya nuan endang bulih sukung majority dua-petiga dalam Rumah DUN, nuan endang Kepala Menteri. Lalu lebuh maya Pakatan Rakyat mujur tama ngagai Putrajaya, kami enda ulih mejal nuan pansut ari opis nuan. Nya endang bisi dikembuan dalam Konstitusyen Menua Sarawak. Lalu seagi-agi nya mih nuan bulih sukung raban majority dalam Rumah DUN.

TANG... baka ni enti SPDP enggau PRS enggau mayuh agi bala YB ari PBB tak enda mukai-mukai merejuk tama PR berengkah ari 6hb May, lalu nuan lenyau sukung majority dalam Rumah DUN nya? Dalam leka jaku nuan, “ditumbangka ngena pengasar” tentu amat-amat nyadi. Dalam leka jaku kami, “pengelurus deka pegari.” Konstitusyen Menua Sarawak nya terang bendar. Sebarang sapa orang ti bulih sukung majority dalam Rumah DUN tentu didirika nyadi Kepala Menteri. Baka ni enti bala penyukung nuan ti udah bekalih raung lalu bediri di belakang YB Baru Bian lalu enda belampung ati meri sukung ngagai penuh ngagai iya, lalu dalam sekelip mata nirika iya nyadi Kepala Menteri ti baru? Ulih nuan ngumbai Konstitusyen Menua Sarawak nya salah lalu nerima pengalah nuan nya?

 (Engka roh niang Stephen Kalong Ningkan benung regap-regap deka bebalas, lalu ngambi pulai pengelurus ...)

Lumur 2. Aram kitai arapka “numbang ngena pengasar” enda deka nyadi lalu bala penyukung nuan dalam Rumah DUN mengkang taluk sereta angkun ke nuan. Nadai raung bekali. Lalu nuan mengkang nyadi Kepala Menteri.

TANG ... lebuh Menteri Besai baru Pakatan Rakyat di Putrajaya ngangkatka pemanah Opis MACC ti “manchal”, Opis Lawyer Bansa enggau raban PDRM lalu meri arah ngagai sida bejalaika pengawa sida enda ngira ba sapa-sapa ti bepangkat tauka enda bepangkat, lalu udah nya ditambangka ngena penerebai bilun ke terubah ke Kuching ngambika bejalaika pansik sida ba nuan lalu ngechas nuan ngena mayuh macham tuduh ngelaban nuan? Baka ni? Nuan beduduk ari atas undang-undang? Lalu enti nuan ditemu salah, agi nuan mengkang nyadi Kepala Menteri?

Ba pengujung iya tu, terang bendar nuan ngumbai diri bisi kuasa dikena nuan ngemba bala mensia mayuh. Selamat datai ngagai abad ke-21, Taib. Diatu mensia mayuh udah bepelajar. Sida tau bulih berita enggau sebarang penerang ngena chunggai tunjuk jari. Diatu ukai baka dulu kelia ti endur nuan ulih ngemba kami ngena pemula lalu madahka diri deka ngelunsin kami ngena rutan enti kami tu manchal.

Diatu, nuan nya mih orang ti pemadu takut sereta nangi. Lalu baka ni kami nemu nya? Ari kami ti beratika pendiau nuan ti enda liat ati ba mua mensia mayuh. Nemu nuan, sapa ti benung bepegaika rutan diatu?